Kiko bo tin derechi riba dje?

Bo dòkter di kas ta bo promé punto di kontakto pa problema di salú. E ta vigilá e bista general di bo salú total i ta referí bo si esei ta nesesario. Tur persona sigurá tin derecho riba kuido i tratamentu médiko di un dòkter di kas. Tratamentu di laboratorio, radiológiko, di funshon, i eksámen di patologia i anatomia referí pa e dòkter di kas ta kai bou di e seguro. Medisina alternativo i kùrmentu médiko no ta kai bou di kuido di dòkter di kas i no ta kai bou di e seguro.

Tur hende ku ta sigurá serka ZJCN tin derecho riba kompensashon di transporte di hende malu. Esaki ta tokante:

• Transporte nesesario pa motibunan médiko via ambulans, for di òf pa un instituto di kuido, pa òf for di bo bibienda
• Kompensashon di transporte (no den ambulans) pa personanan sigurá ku tin mester di diálisis di nir, kimoterapia, òf radioterapia i ku por move únikamente ku un ròlstul, òf tin bista limitá di moda ku nan no por move nan so
• 'Ambulans aéreo' ora dor di un enfermedat òf un aksidente tin un situashon di emergensia di moda ku traslado médiko ta nesesario
• Transporte durante trasladonan médiko; for di i pa aeropuerto, i for di e lugá di estadia pa e lugá di destinashon i vice versa

Pa kompensashon di e transporte di hende malu mester di pèrmit previo di ZJCN, a ménos ku por papia di un situashon di emergensia. E kompensashon pa transporte di hende malu por varia pa destinashon.

E kuido sikológiko di promé linia ta konsentrá su mes riba tratamentu di problemátika di severidat leve pa moderá.

Hopi biaha, e tratamentu tin un durashon korto. Bo dòkter di kas, spesialista òf dòkter di kas di kuido por preskribí tratamentu pa un sikólogo. Ora e sikólogo duna un diagnóstiko, bo tin derecho riba maksimalmente 9 tratamentu pa indikashon. Esaki ta inkluso e promé konsulta. Ademas bo no tin derecho riba kompensashon pa asistensia ku problema ku trabou i/òf relashon.

Ora mester atmití bo den hospital, e seguro médiko ta kubri esaki.

Pa kuido di partera, mama i yu tin derecho riba atmishon den un hospital. Si e ta aplikabel, lo kompensá atmishon den un klase mas haltu den kaso di un nesesidat médiko. E dòkter ku ta atendé e pashènt lo determiná esaki.

Fisioterapia i terapia di ehersisio Cesar i Mensendieck

Fisioterapia i terapia di ehersisio ta dirigí riba sanashon, bahamentu di dòlò, òf mantenshon di un estado físiko mas mihó posibel. Pa fisioterapia i terapia di ehersisio, bo tin mester di un referensia di un dòkter di kas òf un spesialista.

Pa mucha te ku 17 aña ta kompensá e promé 9 tratamentunan pa aña kalendario. Si esaki no ta basta, e dòkter ku ta referí por entregá un petishon di kontinuashon pa 9 tratamentu mas den e mesun aña. E total pa aña pues ta un máksimo di 18 tratamentu.

Pa personanan sigurá di 18 aña òf mas lo kompensá fisioterapia den kaso di e malesanan  ku ta riba e lista limitativo. E promé 20 tratamentunan no ta bini na remarke pa kompensashon. Por haña e lista den e Areglo Derecho Seguro médiko BES, paragraf 4, artíkulo 1.4.2. Pa algun malesa a stipulá un periodo máksimo. Bo terapista por informá bo tokante esaki.

Pa kompensashon di fisioterapia i terapia di ehersisio bo dunadó di kuido mester pidi pèrmit previo serka ZJCN.

Logopedia

Personanan sigurá tin derecho riba logopedia ku e meta médiko di rekuperá òf mehorá nan abla. Pa esei bo tin mester di un referensia di un dòkter di kas, un spesialista òf un dentista. No ta kompensá logopedia pa metanan ku no ta médiko (por ehèmpel disleksia, papia den públiko òf entrenamentu di kanto).

Pa kompensashon di logopedia mester tin pèrmit previo di ZJCN.

Èrgoterapia

Èrgoterapia ta promové òf restorá e kuido propio i e abilidat di yuda bo mes dor di siña hende pa bolbe hasi nan aktividatnan diario mas mihó. E èrgoterapeuta ta duna konseho, instrukshon, entrenamentu òf tratamentu den su kamber di tratamentu òf na bo kas. Pa èrgoterapia bo tin mester di un preskripshon di un dòkter di kas, un spesialista, òf un dòkter di kas di kuido. I bo tin derecho riba maksimalmente 10 ora di tratamentu pa aña.

Konseho di dieta

Informashon i konseho di dieta i kustumbernan di kome ku un meta médiko bo por haña serka un dietista. Pa esaki bo tin mester di un preskripshon di un dòkter òf un dentista. I bo tin derecho riba maksimalmente 3 ora di tratamentu pa aña.

Podoterapia

Podoterapia i solé spesial tin komo meta pa redusí òf eliminá kehonan di pia. Pa esaki bo tin mester di un preskripshon di un dòkter di kas òf un spesialista médiko.

Pedikür médiko

Un pedikür médiko ta embolbí ku kuido (spesialisá) di pia i tratamentu di malesa di kueru i di uña. Solamente personanan sigurá ku diabétis tin derecho riba tratamentu di un pedikür médiko. Bo dunadó di kuido mester pidi pèrmit previo serka ZJCN.

Programa pa stòp di huma

Personanan sigurá por partisipá den un programa pa stòp di huma preskribí pa un dòkter di kas òf un spesialista. Aki ta trata di asistensia médiko i, si ta nesesario, farmaséutiko ku ta inkluí den e Kwaliteitsregister Stoppen met Roken (Registro di Kalidat di programanan pa Stòp ku Humamentu). Bo por sigui un programa pa stòp di huma maksimalmente 1 biaha den un aña kalendario. Bo mester tin pèrmit previo di ZJCN pa esaki.

Intervenshon kombiná den estilo di bida

Pa personanan sigurá di 18 aña òf mas por kompensá kuido preskribí pa un dòkter di kas òf un spesialista den kaso di intervenshon kombiná den estilo di bida (GLI). GLI ta un programa di dos aña orientá riba kome mas saludabel, (ingerí ménos energia), move mas, i riba sosten sikológiko pa kambio di komportashon. Por sigui un programa di GLI maksimalmente 1 biaha pa 24 luna. Ora no sigui e programa kompleto, lo kompensá solamente un parti.

Pa kompensashon di partisipashon den un programa di GLI bo tin mester di pèrmit previo di ZJCN.

Kuido dental ta kuido i rekuperashon di bo djentenan. Personanan sigurá te ku 18 aña tin derecho riba e pakete kompleto di kuido di djente i kuido di boka.

Pa persona siguránan di 18 aña i mas lo kompensá lo siguiente: prótesis removibel, prótesis removibel parsialmente (pues aki no ta trata di brùg òf korona di djente), tratamentu nesesario pa motibunan médiko i sirugia di djente i e eksámen di rayo X korespondiente. No ta kompensá sirugia na ensia di djente, rankamentu simpel i implante.

Ora personanan sigurá no sigui instrukshon di dentista òf ta neglishá higiena di boka severamente, no ta kompensá asistensia dental.

Kuido farmaséutiko tin di haber ku suministrá i duna remedi.

E seguro médiko ta kompensá remedi preskribí pa un dòkter, un dentista òf un partera. E kuido farmaséutiko tambe ta enserá konseho i sosten dor di botikario, preparashon di dieta den sierto kaso médiko, i bakuna kontra grip. En prinsipio, ta preskribí remedi riba nòmber di sustansia.

Persona sigurá femenino tin derecho riba kompensashon di e siguiente antikonseptivonan: spiral (di hormona), staf di hormona i pesario. Tambe e píldora antikonseptivo di emergensia; e morning-after pill.

No ta kompensá remedinan ku ta optenibel libremente (sin resèpt), maske bo tin un resèpt.

Medionan ousiliar ta enserá suministro di medio ousiliar. Bou di esakinan ta kai, en breve:

• Prótesis
• Medio ousiliar antikonseptivo
• Verbant
• Angua
• Medio ousiliar pa mira, tende, pa mobilidat òf pa hala rosea
• Medio ousiliar den kaso di diabétis
• Medionan di kuido
• Medionan ousiliar pa kompensashon di durashon largu di pèrdida di funshon den ardunan di sanger i ardunan linfátiko òf den brasa, man i dede
• Medio ouksiliar kontra doló króniko
• Medionan ouksiliar pa komunikashon i señalamentu
• Medionan ouksiliar pa suministro di alimento òf infüs
• Elemento di interior (di kas) pa adaptashon di bibienda
• Medio i gastu pa diálisis na kas

Un bista general detayá di e medionan ouksiliar ku bo por reklamá bo por haña den e Areglo Derecho Seguro médiko BES, paragraf 7, artíkulo 1.7.5-1.7.31.

Pa sierto medio ouksiliar, manera kompra di un ròlstul, pèrmit previo di ZJCN ta nesesario. E dòkter ku ta atendé bo òf e suministradó di medio ouksiliar sa pa kua medio ouksiliar esaki ta konta. Tambe, pa algun medio ouksiliar ta pidi un kontribushon propio. Kambio, remplaso òf rekuperashon di medio ouksiliar ta inkluí, a ménos ku por papia di kasonan di negligensia. ZJCN ta determiná si por suministrá medio ouksiliar komo propiedat òf mester fia esaki.

Kuido di partera ta konsistí di guia durante parto i kuido promé i despues di parto pa un partera, dòkter di kas òf spesialista médiko.

Kuido di partera i kuido durante parto den hospital ta kompletamente kompensá. Kompensashon di hospitalisashon tin un máksimo di 3 dia, a ménos ku un periodo mas largu ta un nesesidat médiko. Lo kubri kuido ginekológiko a base di indikashon médiko.

E kompensashon di kuido di partera ta inkluí uso di sala di parto, artíkulo médiko i di kuido, i gastu di laboratorio.

Kuido postnatal ta e kuido i asistensia pa mama i yu despues di parto.

Bo tin derecho riba kuido postnatal na kas pa durashon di un mínimo di 24 ora i un máksimo di 49 ora, repartí entre un máksimo di 6 siman. Lo kompensá kuido postnatal den un sentro di maternidat pa un durashon máksimo di 8 dia. Un enfermera di maternidat òf un organisashon di kuido postnatal ta duna e kuido.

Kompensashon pa kuido postnatal tambe ta enserá un pakete postnatal, artíkulo médiko i di enfermeria i asistensia di un eksperto riba tereno di dunamentu di lechi - ei último aki riba referensia di e partera òf e konsultorio pa yu.

Ora un persona sigurá fayesé durante un traslado médiko òf transporte di emergensia ku un ambulans aéreo, ZJCN huntu ku su partnernan ta enkargá ku e repatriashon. ZJCN ta responsabel pa e repatriashon te na e aterisahe riba e isla di residensia.

Kuido di durashon largu ta enserá:

• Kuido personal, enfermeria òf guia na kas di un persona sigurá
• Atmishon i estadia mas aleu den un kas di kuido pa ansiano, un kas di kuido, òf un instituto pa hende ku desabilidat
• Screening di prek di hilchi i tratamentu nesesario eventual

Pa kompensashon di kuido di durashon largu, e dunadó di kuido mester pidi pèrmit previo serka ZJCN. Den kasonan urgente, por pidi e pèrmit despues.

Kuido na kas

Lo duna e kuido na kas di un persona sigurá pa un organisashon di kuido na kas, un kas di kuido, un kas di kuido pa ansiano, òf un institushon pa hende ku desabilidat ku ZJCN ta asigná.

Estadia den un instituto

Atmishon i estadia mas aleu den un instituto ta pa personanan sigurá ku tin mester di un ambiente di biba protektor, un klima di biba terapéutiko, òf supervishon permanente.

Kuido di intérprete di lenga di signo

Kuido di intérprete di lenga di signo ta kuido pa un intérprete di idioma di signo ora di hiba un kòmbersashon den e situashon di biba. Durashon di e kuido aki ta maksimalmente 30 ora pa aña kalendario. Pa personanan sigurá ku ta surdu i siegu, durashon di e kuido di intérprete di lenga di signo ta maksimalmente 168 ora pa aña kalendario. Lo kompensá e kuido solamente si riba bo isla tin un intérprete di lenga di signo ta traha, i si e kuido ta dura minimalmente 30 minüt.

Kuido terminal paliativo 

Kuido paliativo ta orientá riba hende ku ya no por kura mas. E meta ta pa mantené e kalidat di bida mas tantu posibel i mehor’é kaminda ta posibel. Pa personanan sigurá ku tin mester di kuido paliativo terminal, e seguro médiko ta kompensá estadia, enfermeria i kuido den un hospice. Pa kompensashon di kuido terminal paliativo, e dunadó di kuido mester pidi pèrmit previo serka ZJCN.

Habitantenan di Boneiru ku ta biba independientemente na kas pero pa motibu di enfermedat òf  malesanan síkiko no por hasi uso di fasilidatnan general, por akudí na e Lokèt Aksesibel di Sentro Akseso pa nan fasilidat personalisá. Fasilidatnan personalisá ta por ehèmpel pasatempu diario, kuido na kas, fasilidat di kuminda òf medio ouksiliar médiko.

Ret sosial promé

No tur hende ku ta biba na kas ku un malesa outomátikamente ta bini na remarke. Lo wak entre otro e ret sosial ku un hende tin. Mantenshon di kas independientemente no ta bai bon? E ora ei ta ferwagt ku e ret sosial ta duna sosten. Solamente ora esei no ta bai sufisientemente bon òf ora un hende no tin un ret sosial, un fasilidat personalisá ta bira un opshon.

Bo por haña mas informashon den e Fasilidatnan personalisá FAQ.

Kon pa hasi petishon?

Habitantenan di Boneiru por hasi un petishon serka e Lokèt Aksesibel di Sentro Akseso. Esaki ta posibel via telefòn, online, òf na e lokalidat. Kolaboradónan ta yuda yena e petishon. Sentro Akseso i ZJCN lo husga esaki. Denter di un tempu kumbiní, e petishonario lo tende si lo asigná e asistensia. Lo asigná e asistensia? E ora ei e petishonario lo risibí un disposishon por eskrito. Ku e disposishon por eskrito, e petishonario tin derecho riba asistensia.