Q&A: Mi tin derecho riba un seguro médiko di ZJCN?

Ora bo a haña un disposishon (pèrmit di estadia) di e Servisio di Inmigrashon i Naturalisashon (IND), bo por inskribí bo mes por lo pronto pa e seguro médiko di ZJCN. Despues ora bo a risibí bo sédula, bo por inskribí bo mes definitivamente. 

Ora bo muda pa Boneiru, Saba òf Sint Eustatius i bo no tin un disposishon di IND ainda, ta importante pues pa bo mes sera un seguro médiko komo transishon. Esaki ta pa prevení ku bo no tin seguro médiko te ora bo ta (legalmente/ofisialmente) inskribí den e registro sivil di Hulanda Karibense.

E fecha di entrega di e disposishon di IND lo usa komo fecha di komienso di e seguro médiko BES. Gastu di kuido ku e persona sigurá a hasi promé ku e fecha ei, no por deklará despues serka ZJCN. 

Ora bo bai traha pa un dunadó di trabou hulandes karibense na Hulanda Karibense, a base di un deklarashon di dunadó di trabou bo por ta inskribí temporalmente pa 3 luna serka e seguro médiko di ZJCN. Asina ku bo tin bo sédula òf bo pèrmit di estadia, a base di esaki bo por laga inskribí bo mes pa durashon di balides di bo sédula òf bo pèrmit di estadia. Si denter di 3 luna ainda no a logra hasi esaki, bo por bini e ofisina di ZJCN pa pidi ekstenshon di bo seguro médiko. E ekstenshon aki tambe ta konta pa 3 luna mas.

Bo por inskribí bo mes for di e momentu ku bo tin un disposishon (pèrmit di estadia) di Servisio di Inmigrashon i Naturalisashon (IND). E prosedura di inskripshon serka IND por dura te 6 luna.

Bo tin e obligashon di inskribí bo mes den e registro sivil di Hulanda Karibense. Ora bo a inskribí bo mes, Ofisina di Registro Sivil ta traha un sédula (tarheta di ID) pa bo. E sédula aki abo komo persona sigurá semper mester tin huntu ku bo, di moda ku e un dunadó di kuido por kontrolá si bo ta inskribí den e atministrashon di persona sigurá. E ora ei e dunadó di kuido por pasa e gastunan pa kuido suministrá direktamente pa ZJCN.