Tur hende ku ta traha òf biba legalmente na Boneiru, Sint Eustatius òf Saba ta sigurá pa kuido riba e islanan aki. Pa bin na remarke pa e seguro médiko BES bo mester inskribí bo mes serka Kuido i Hubentut Hulanda Karibense (ZJCN).
Tin algun regla i kondishon mará na un inskripshon. Solamente ora bo kumpli ku esakinan, nos por inkluí bo den e fail di seguro médiko di ZJCN.
Pues ora bo muda pa Boneiru, Saba òf Sint Eustatius ta importante pa bo mes sera un seguro médiko komo transishon. Esaki ta pa evitá ku bo ta sin seguro médiko te ora bo ta (legalmente/ofisialmente) inskribí den e registro sivil di Hulanda Karibense. Den kaso di un estadia turístiko bo no tin derecho riba e seguro médiko BES.
Inskribí pa e seguro médiko serka bo ofisina di ZJCN?
Bo por inskribí bo mes pa e seguro médiko serka ZJCN solamente despues ku bo ta inskribí den e registro sivil di Boneiru, Saba òf Sint Eustatius. Despues bo ta bai e bali di ZJCN ku tur e dokumentonan akibou:
- Sédula / tarheta di ID.
- Deklarashon di Atmishon Legal, òf Pèrmit di estadia, òf un prueba di petishon pa ekstenshon di un di e dokumentonan aki. Si bo ta un yu di tera, un sédula ta sufisiente.
- Deklarashon di dunadó di trabou (si bo ta traha pa un dunadó di trabou na Hulanda Karibense).
- Si bo ta bini for di Hulanda: un prueba di e fecha di terminashon di bo seguro médiko hulandes.
Bo NO ta bini na remarke pa inskripshon si:
- Bo dunadó di trabou ta un organisashon di derecho públiko hulandes.
- Bo ta obligá pa tin un seguro na Hulanda.
- Bo ta paga impuesto di salario riba bo sueldo for di trabou den un otro pais.
- Bo ta na e islanan di Hulanda Karibense komo turista.
Paga tinu! Bo tin e obligashon di inskribí bo mes na Ofisina di Registro Sivil (Burgerzaken). Ora bo a inskribí bo mes, Registro Sivil ta traha un tarheta di identidat (sédula/karnèt di ID) pa bo. E sédula/ tarheta di ID aki abo komo persona sigurá semper mester tin huntu ku bo, di moda ku e dunadó di kuido por kontrolá si bo ta inskribí den e atministrashon di persona sigurá.