Pa bini na remarke pa e seguro médiko BES bo mester inskribí bo mes serka ZJCN. Bo por buska un formulario di inskripshon pa esaki serka ZJCN òf download e aki. Tin algun regla i kondishon mará na inskripshon. E kondishonnan di mas importante ta:
Resien nasí/menor di edat
Bebinan resien nasí i menornan di edat lo inskribí ku un ekstrakto for di registro sivil. Riba e ekstrakto aki en todo kaso mester menshoná e nashonalidat.
Inskribí a base di residensia
Un persona por inskribí su mes ora e ta biba legítimamente na un di e islanan i ta disponé di un sédula/tarheta di identifikashon.
Inskripshon a base di un pèrmit di estadia òf un deklarashon di atmishon legal
Personanan ku un deklarashon di atmishon legal òf un pèrmit di estadia pa un tempu (in)definí, por inskribí nan mes pa durashon di e pèrmit.
Inskripshon a base di un petishon pa ekstenshon di pèrmit di estadia
Personanan ku a pidi IND na tempu pa ekstenshon òf kontinuashon di nan pèrmit, por inskribí nan mes te ku a tuma un desishon irevokabel tokante e petishon.
Inskripshon a base di un deklarashon di dunadó di trabou
Personanan ku un kontrato di trabou di kua e salario ta suheto na e Wet Loonbelasting BES (Lei Impuesto riba salario BES) por inskribí nan mes pa durashon di e kontrato di trabou.
- Añadí e komprobantenan menshoná akiriba serka bo inskripshon di moda ku ZJCN por prosesá bo inskripshon denter di 24 ora.
Personanan ku un Outorisashon pa Estadia Temporal (mvv)
No por inskribí personanan ku un Machtiging tot Voorlopig Verblijf (mvv, Outorisashon pa Estadia Temporal) komo persona sigurá i pues nan no tin derecho riba kuido tampoko. Solamente ora e personanan aki ta dispone di un pèrmit di estadia di IND, nan por inskribí nan mes serka ZJCN.