Biba bou di guia

E lokalidat di biba bou di guia di Jeugdzorg tur aña ta ofresé espasio pa mas o ménos 9 pa 12 hóben di Boneiru, Sint Eustatius i Saba entre e edatnan di 16 pa 23 aña. E hóbennan aki ta den un trayekto di asistensia di Jeugdzorg durante un periodo largu i ta kla pa e siguiente paso pa haña mas independensia. E hóbennan aki no por bai kas bèk pasobra nan situashon na kas no a kambia, apesar ku a hasi uso di asistensia pa un tempu largu. Den e situashon na kas hopi biaha por papia di un akumulashon di problema, di moda ku e hóbennan aki no por konta sufisientemente ku sosten den e proseso di transishon di hóben pa adulto.

Guia intensivo

E meta di e trayekto di biba bou di guia ta pa hóbennan ta kapas pa duna direkshon na nan bidanan di un forma independiente den un periodo di mas o ménos dos aña. E guia aki entre otro ta dirigí riba:

• oumentá outosufisiensia
• independensia
• kuido di nan mes
• siña abilidatnan sosial, di relashon i práktiko

E guia ta konektá ku e asistensia eksistente di Jeugdzorg. A base di un plan di akshon personal, e hóbennan ta pasa den tres fase den e proseso di biba bou di guia. Kada fase konosé metanan di siña personal, i ta adaptá e guia na esakinan. E guia den e promé fase ta enfoká riba orientashon. Por ehèmpel, ta orientá e hóbennan riba bai skol i haña un trabou temporal. Den fase dos, e guia ta orientá riba ‘coaching’. E hóbennan ta haña workshop tokante étika di trabou i ta coach nan pa, di un manera korekto, desaroyá un sentido di responsabilidat i un bon étika laboral. Den fase tres, e guia ta enfoká riba duna konseho. E hóbennan ta bai traha di un manera independiente i ta haña guia tokante tópikonan ku nan ta enfrentá na trabou.

Alohamentu i mudansa pa bibienda adekuá

Un proyekto piloto di dos aña pa biba bou di guia a start dia 15 di mart 2021. Den promé instansia, e fasilidat tabata situá den un kompleho di apartamento den Kaya Sabana na Boneiru. Huntu ku e asosiashon di konstrukshon di kas Fundashon Cas Bonairiano (FCB) a wak e posibilidat pa realisá un edifisio nobo pa kontinuá ku e proyekto den futuro. Entretantu a logra hasi esaki, i for di febrüari 2024, biba bou di guia ta situá den un edifisio nobo den Kaya Mendelssohn 20A.

Tin un palabrashon fiho ku FCB tokante mudansa pa un bibienda adekuá. Despues ku nan a pasa den e trayekto di biba bou di guia, lo asigná un bibienda na e hóbennan. Durante e trayekto, ya nan a traha riba nan independensia kaba, i awor nan ta kla pa biba riba nan mes. E hóbennan ta haña guia ambulante durante un periodo ku ta kuadra ku nan nesesidatnan, pa duna nan apoyo den e fase nobo aki.