Mediashon
Ora mayornan ta diskutí, nan no mester embolbí un yu den e diskushonnan ei. Esaki ta perhudiká desaroyo di un mucha. Tambe ta importante ku un mucha por sigui wak su mayornan biológiko, tambe ora e no ta biba ku nan. Por ehèmpel ora e mucha ta biba temporalmente ku un famia di kriansa òf si su mayornan ta divorsiá.
Mediashon ta yuda mayornan papia mihó ku otro. Pa asina tin ménos pleitamentu. Durante mediashon ta krea akuerdonan ku tur hende mester tene nan mes na dje durante e seshon. Ora un mucha ta biba den un famia di kriansa òf ora su mayornan ta divorsiá, Jeugdzorg huntu ku e mayor(nan) ta krea un areglo di bishita.
Si mayornan no por komuniká ku otro na un manera adekuá, mediashon por yuda. Un profeshonal ta purba mehorá e komunikashon entre e mayornan. Esei ta mihó pa e mucha.
Mediashon por yuda:
- Ora tin pleitamentu frekuentemente.
- Ora tin problema di komunikashon entre edukadó.
- Den kaso di violensia doméstiko entre e mayornan.
- Ora mayornan no ke papia ku otro mas.
- Ora un divorsio no ta kanando bon.
Un mucha tin derecho riba un bon kontakto ku tur dos mayor. Ta dañino pa un mucha ora su mayornan ta pleita ora e mucha ta presente. Mayornan no mester involukrá nan yu den pleitamentu, o papia negativo di e otro mayor ora e mucha ta presente. Tambe ta importante pa un mucha no ta testigu di violensia.
Durante mediashon ta redaktá reglanan di komportashon vigente durante e seshonnan di mediashon. Ta hasi esaki den konsulta ku tur dos mayor. Durante mediashon semper tur dos mayor ta presente na mes momentu. Mediashon por dura un máksimo di 5 seshon.
Un mucha tin derecho riba kontakto ku su mayor(nan). E mayornan tin derecho pa mira nan yu. Tambe ora e mucha no ta biba na kas. Tin biaha, un di e mayornan no ke pa e otro mira e yu. Jeugdzorg ta imparsial i ta bai den kòmbersashon ku tur dos mayor. Huntu nos ta elaborá un areglo di bishita ku ta mihó pa e mucha. Ta stipulá e derechonan i obligashonnan di mayornan den e areglo di bishita.
