Kuido di kriansa
Kada mucha mester krese na un lugá seif ku amor i struktura. Tin biaha tin problema den un famia di moda ku un mucha temporalmente no por biba na kas.
Promé, Jeugdzorg ta wak si un mucha temporalmente por biba serka un otro hende denter di e ret di e famia. Si esaki no ta posibel, e ora ei por pone e mucha den un famia di kriansa. E forma di akohida aki yama kuido di kriansa i ta esun ku mas ta parse e situashon di famia natural. Hopi biaha, esei ta loke ta mas agradabel pa un mucha. Mayornan di kriansa e ora ei ta tuma over e kuido di e mucha pa un tempu korto òf mas largu.
No ta hasi uso di kuido di kriansa sin mas. Mayoria famia promé ta haña asistensia ora e mucha ainda ta biba serka e mayornan. Si esei no ta sufisiente i desaroyo i /òf siguridat di e mucha ta na peliger, e ora ei por disidí ku e mucha (temporalmente) ta bai biba un otro kaminda.
Por hasi uso di kuido di kriansa pa hopi diferente motibu. Por ehèmpel pasobra e mayornan pa un tempu no por sigui ku e kriansa, òf pa motibu di enfermedat. Pa e mucha e ora ei (i hopi biaha pa e mayornan tambe) ta mihó pa e mucha temporalmente biba den un otro famia, òf de bes en kuando pasa anochi serka un otro famia.
Kuido di kriansa di krísis – Akohida di durashon korto den kaso agudo ora na kas e mucha no ta seif.
Kuido di kriansa di durashon korto – Akohida temporal (algun siman pa algun luna) pa buska solushonnan.
Kuido di kriansa di durashon largu – Pa mucha ku no por biba na kas, te ora nan bira independiente.
Kuido di kriansa den wikènt i den fakansi– Akohida temporal pa aliviá e mayornan.
Komo mayor di kriansa, bo mes ta skohe e tipo di akohida ku bo ta deseá: wikènt, fakansi, akohida korto òf di durashon largu. Asina ta posibel pa kombiná e kuido di kriansa ku bo situashon di biba i di traha personal.
Komo mayor di kriansa bo ta ofresé un kas na muchanan ku ta biba den sirkunstansianan difísil. Tin biaha pa un tempu korto, tin biaha tambe pa algun luna òf mas. Tur hende for di 21 aña en prinsipio por bira mayor di kriansa. Loke ta konta ta ku bo por ofresé un mucha struktura, kalor i siguridat, pero tambe tin rèspèt pa su mayornan. Huntu ku nan, i ku guia di Jeugdzorg, bo ta sigui traha riba futuro di e mucha.
Tin algun kondishon ku mayornan di kriansa mester kumpli kuné:
- Bo tin minimalmente 21 aña;
- Bo por presentá un Deklarashon Tokante Kondukta (VOG) tur aña;
- Bo ta risibí un Deklarashon di No Opheshon (VGB) di Voogdijraad CN (Konseho di Tutela CN). Jeugdzorg ta pidi e deklarashon aki;
- Bo ta kooperá ku un screening dor di Jeugdzorg, ku ta konsistí di kòmbersashonnan informativo, entrevistanan i un bishita na kas;
- Bo ta indiká serka ken por pidi referensia. Por ehèmpel na skol si bo tin un yu den skol básiko kaba, òf serka famia, amigu, dunadó di trabou i otronan. Semper lo diskutí e informashon ku e referentenan duna ku bo.
- Bo ta sigui e ‘Entrenamentu den Fase’ preparatorio pa hende ku ta aspirá pa bira mayornan di kriansa. E entrenamentu ta dura seis parti di dia, i ta tene kuenta ku bo oranan di trabou. Den e entrenamentu aki bo ta siña mas tokante diferente tema ku tin di haber ku kuido di kriansa, manera trasfondonan i desaroyo di yunan di kriansa, lasonan, problema di komportashon i kontakto ku mayornan biológiko;
- Bo ta habrí pa kooperashon ku Jeugdzorg i bo ta duna sosten ku ehekushon di e plan di asistensia pa bo yu di kriansa.
- Komo parti di e screening pa hende ku ta aspirá pa bira mayornan di kriansa nos ta hasi un investigashon di skol. Aki nos ta dirigí nos mes únikamente riba bo embolbimentu ku e skol di bo yu.
'Mi ta un mama di kriansa pasobra nos muchanan ta nos futuro. Kada simia ku nos ta sembra awor, por hiba na un kosecha bunita. Tin momentu ku ta mas difísil ku otro, dor di loke mi yu di kriansa a pasa aden. Pero ora mi mira su smail i kon e por ta su mes, mi ta kòrda atrobe pakiko mi ta hasié.'
Mayornan di kriansa no ta nan so pará, Jeugdzorg ta sostené mayornan di kriansa. E profeshonal di kuido pa hóben huntu ku bo i ku e famia biológiko ta traha riba un Plan di Akshon pa e mucha. E famia di kriansa tin un papel importante den esaki. E profeshonal di kuido pa hóben tambe ta e punto di kontakto pa pregunta tokante kriansa i ta sostené bo ku asuntunan práktiko. Ora surgi problemanan spesífiko, un sikólogo di mucha òf un sikiater di mucha por duna guia spesialisá.
Tur aña, Jeugdzorg tambe ta organisá training i enkuentro pa mayornan di kriansa, tokante tópikonan aktual den kuido di kriansa. Tres biaha pa aña tin e “Café di kuido di kriansa” kaminda mayornan di kriansa por kompartí nan eksperensianan i haña konosementu nobo.
Kompensashon di kuido di kriansa
Komo mayor di kriansa bo tin gastunan èkstra. P’esei bo ta risibí un kontribushon den e gastunan pa kuido di un yu di kriansa. Ku e kompensashon aki bo mester paga tur gastu pa e yu di kriansa. Por ehèmpel artíkulo pa skol, kuminda i kos di bebe, deporte, zakgeld i fakansi. E altura di e kompensashon ta dependé di edat di e yu di kriansa.
Komo mayor di kriansa bo mester kumpli ku sierto kondishonnan, manera ofresé un ambiente stabil i seif, ofresé kriansa sin violensia, i yuda ku desaroyo di un bista positivo di su mes serka e yu di kriansa. Ademas ta importante pa bo komuniká ku otronan di un forma habrí, positivo i kla, traha huntu bon ku mayornan i dunadónan di kuido, i tin komprondementu di e impakto di e kuido di kriansa riba bo propio situashon.
Apesar ku e kondishonnan aki ta esensial, nos ta komprondé ku semper por tin puntonan di atenshon ku ta pidi sosten òf guia èkstra. Jeugdzorg ta para kla pa sostené bo ku esaki i traha huntu riba solushonnan, di moda ku bo por ofresé un ambiente seif i kuidadó pa e yu di kriansa.
'Mi ta mayor di kriansa pasobra mi tabatin un sintimentu fuerte ku mi kier a sòru pa un mucha. E reto di mas grandi ta pa komprondé e trouma ku yunan di kriansa a sufri. Esei ta rekerí pasenshi. Pero ora mi mira e konfiansa propio krese e ora ei, i mi yu di kriansa ta sintié bon, esei e ora ei ta un rekompensa grandi pa mi.'